சீக்குபுடிச்ச ராசா

அந்த காலத்துல ஒரு பெரிய மலைக்கு கீழ ஒரு சின்ன நாடு இருந்துச்சு.

அந்த நாட்டை ஒரு சீக்குபுடிச்ச ராசா ஆண்டுகிட்டிருந்தான்.

அந்த மலைக்கு மேல ஒரு நல்ல ஆட்டக்காரப்புள்ளை இருந்துச்சு.

ராசாவுக்கு வேட்டையாடற ஆச வந்துச்சு.
தன்னோட தளபதிய கூப்புட்டு அவனோட ஆசய சொன்னாம்.

தளபதியும் பல்லக்கு கட்டி சீக்குராசாவ
பொணத்த தூக்கறாப்புல நாலு ஆள வச்சு மலமேல தூக்கிட்டுப்போனாம்.

அங்கன போற பாதையில சீக்குராசா அந்த ஆட்டக்கார புள்ளைய பாத்தான்.

மன்மதன் சீக்கு ராசாவுக்குள்ள பூந்துட்டான்.
இடுப்பு செத்தா என்ன., ஆசை சாகலியல்லோ சீக்கு ராசாவுக்கி?

ஒடனே அவ வூட்டுக்குப்போயி,
"உம்பொண்ணக்கெட்டி வெய்யி
எனக்கு "ன்னு அவ அப்பன்ட்ட பொண்ணு கேட்டான்.

"ராசாவாச்சே என்ன செய்ய?

"சரி "ன்னான். ஆட்டக்காரியோட அப்பங்காரன்.

பொண்ண அழைச்சுக்கிட்டு மல எறங்குனான் சீக்குராசா.

இது இருவத்தோராவது பொண்டாட்டி ராசாவுக்கு.

கண்ணாலம் கெட்னானே ஒழிய ஒண்ணும் முடியல சீக்கு ராசாவால.

மேலுக்கு ரொம்பவும் சொகமில்லாம போச்சு.

நம்ம தளபதிக்கோ ஆட்டக்காரி மேல ஒரு கண்ணு.

சீக்குராசாவோ முதுகுல ராஜபிளவைக்கட்டி வந்து கெடக்கான்.
கட்டுன புள்ள போன கார்த்திகைக்கு ஏத்துன பித்தள வெளக்காட்டம் தொலங்காம கெடக்குது.

தளபதி சமாச்சாரம் அரசல்புரசலா ராச காதுல வுளுந்தது.

சீக்குராசாவுக்கு மேலுக்குத்தான் முடியலியே ஒழிய மண்டக்குள்ள
ரோசனை நல்லாத்தான் ஓடுச்சு.

மந்திரிசபையக் கூட்டுனாம்.

"நா ஒரு கோயலக் கட்டலாமுன்னு இருக்கேன், நீங்கள்ளாம் என்ன சொல்றிய?"

"நல்லது ராசா, கண்டிப்பாச் செய்யணும். "
கால்ல விழுந்தது மந்திரிக்கூட்டம்.

'அப்ப ஆகவேண்டியதப் பாருங்க, சிவுக்குன்னு முடிச்சிரனும் பாத்துக்கங்க. ""

சபை கலைஞ்சது.

தளபதி கருவிக்கிட்டே இருந்தாம்.

இந்த சீக்கு ராசாவ எப்படியாவது சீக்கிரம் தீத்துப்போட்டு ஆட்டக்காரிய கைபுடிக்கணும்.

அரண்மனை வைத்தியரு கூட ஒப்பந்தம் போட்டுக்கிட்டான். "சீக்கிரமா ராசாவ காலி பண்ணனும்.ராசா போனதும் ஒனக்கு ஆனதச் செய்யுறன்"

டீல் ஓகே ஆச்சு. '

ராசாவுக்கு மருந்துன்னு எதையோ திங்கக் குடுத்தான் வைத்தியன்.

ராஜபிளவைக்கட்டி பெருசாயி வெடிக்கற நெலமைக்கு வந்திருச்சு.

காலெல்லாம் சொரணையே இல்லே.

மேலேல்லாம் காந்துது.

சீக்கு ராசாவுக்கு தன்னோட முடிவு தெரிஞ்சு போச்சு.

இந்த தளபதியவும், ஆட்டக்காரியவும்
போறதுக்குள்ள ஒரு வழி பண்ணிறனும்.

மந்திரிசபைய மறுபடி படுக்கையறைக்கு கூப்புட்டான்.

கூட தளபதியையும், ஆட்டகாரியையயும்.

"கோயில் வேலை ஆச்சா "

"இல்ல ராசா, நெறய பணம் வேணும் "

"அப்படியா? நம்ம தளபதி பக்கத்து நாட்டு மேல படையெடுக்கட்டும் "

மனசுக்குள்ள சிரிச்சுக்கிட்டான் சீக்குராசா.

தளபதின்னு பேருதானே ஒழிய அவ எந்த சண்டையும் போட்டதில்ல.
சண்டைக்குப்போனா மவன் ஒழிஞ்சான்.

ஆட்டக்காரிய கூப்புட்டான்."நம்ம கோயில்ல 500 ஆட்டக்காரிக ராப்பகலா ஆடணும். அவியளுக்கெல்லாம் நீதா வழிகாட்டணும். அத்தன பேரும் கல்யாணம் மூச்சுக்கக்கூடாது.
சாமியத்தான் கெட்டிக்கணும் "னான்.

,(ங்கொய்யால, தளபதிப்பயலய கணக்குப்பண்ற நீ? இனி எவனையும் கெட்ட முடியாம பண்ணிப்புடறேன் , அதன்னி வாறவன் போறவன்லாம் ஒன்னிய கணக்கு பண்ணப்போறான் இரு, ன்னு ராசா மனசுக்குள்ளயே கருவிக்கிட்டான்.)

அய்யோ ராசா 500பேரு ஆடணும்னா கோயலெல்லா வெளக்கெரியணும்,
கொடங்கொடமா நெய் வேணும், கலங்கலமா நெல் வேணும்."

"அம்புட்டுதானே,
வெளச்சலுல பாதிய வரியா போடு.
மாடும் கன்னும் மேக்கிறவனுக்கு,
பாலும், நெய்யும் காக்கிறவனுக்குன்னு தண்டோரா அடிங்க மந்திரியாரே. "
ன்னாம் சீக்குராசா.

"இப்படி தின்னு கொழுத்தா சீக்கு வருமே ராசா"ன்னாரு வைத்தியரு.

"வைத்தியம் பாருங்க வைத்தியரே...அதுக்கு நா ஒண்ணு தருவேன்., நீர் ஒண்ண கேளும"் னான் ராசா....

எனக்கு கல்லு சொவரு கட்டவும், சொவத்துக்கு வெள்ள பூசவும்
அனுமதி குடுக்கணும்னாரு வைத்தியரு.

அப்படியே நடக்கட்டும்னான் சீக்குராசா.

"நான் ஒரு பரிசு தர்றேன்.உங்களை சம்பந்தி ஆக்கிக்கிடறேன்"னான்.

வைத்தியரு ஒத்த பிள்ளைய பெத்து வெளில தலகாட்டாமெ வளத்தாரு. அதுக்குத்தான் வெச்சாரு சீக்குராசா ஆப்பு.

சீக்குராசாவுக்கு கிறுக்குப்புடிச்ச ஊமப்பயல் ஒருத்தன் இருந்தான்.
அந்த பயலுக்குத்தான் வைத்தியரு புள்ளைய கெட்டச்சொன்னான் ராசா.

மூணு பேருக்கும் ஆப்பச் சொருகிட்டு
பிற்பாடு முதுகுல இருந்த கட்டி வெடிச்சு செத்துப்போனான் சீக்கு ராசா.

Aran Kumar பதிவிலிருந்து...