சில சிறப்பான பழக்கங்கள்

தினசரி வாழ்க்கையில் நீங்கள் கடைபிடித்து வரும் சில சிறப்பான பழக்கங்கள் (ஹாபிட்) என்னென்ன?

1. அலுவலகத்தில்

• எந்த வேலையையும் தள்ளிப் போடுவதில்லை. முப்பது வருடங்களாக பார்த்த வேலையிலும் சரி, இந்த முப்பது நாட்களாக பார்க்கும் வேலையிலும் சரி - எதிலும் விரைவான, உறுதியான முடிவெடுப்பது.
• நேரம் தவறுவதில்லை. வாட்சை பார்க்காமல் பொழுதை செலவளிப்பது என்றால் அலுவலகத்தில் மேலதிகாரியுடன், வீட்டில் மனைவியுடன் மட்டும்தான்.
• மற்றபடி நேர அளவு நிர்ணயித்துதான் டீம் மீட்டிங்; தாண்டி விட்டால் ஸ்டாண்டிங் மீட்டிங்தான்.
• மேலதிகாரியின் ரகசியங்களை காப்பது. பணியில் தவறினாலும், பணியாளர்களின் வருமானத்தில் கை வைக்காமல் தண்டிப்பது. (தண்டனை அவருக்கே, குடும்பத்திற்க்கில்லை)
• எதிர்கால திட்டங்களை யாருடனும் பகிர்வதில்லை. முக்கியமாக பணி சார்ந்த எதிர்கால திட்டங்களை.
• வருமானத்தில் 5% வேலை சார்ந்த படிப்பு அல்லது பயிற்சிக்கு ஒதுக்குவது. வேலையில் அடுத்த நிலைக்கு எப்பொழுதும் தயார் நிலையில் இருப்பது.
• அலுவலகத்தில் அனைவருக்கும் உரிய மரியாதையளிப்பது. அலுவலக அரசியலை தவிர்ப்பது.

2. வீட்டில்

• ஒரு வேலையும் இல்லாவிட்டாலும், அதிகாலை வேளையில் எழுந்து கொள்வது
• எழுந்த இரண்டு மணி நேரத்துக்குள் உடற்பயிற்சி செய்வது. தொடர்ந்தார் போல மூன்று நாட்கள் தவற அனுமதிப்பதில்லை.
• காலை உணவு என்றால் திடமான ஆரோக்கிய உணவு மட்டுமே. உணவகங்களில் உண்பதில்லை.
• தினமும் ஒரு மணி நேரமாவது படிப்பது, முடிந்த அளவு வேலை சார்ந்த படிப்பு.
• செய்ய வேண்டியவை அனைத்தும் பட்டியல் எழுதி, செய்து முடித்ததும் டிக் அடிப்பது.
• காதல் செவ்வாய், காவிய புதன் என்று தேடிப்போய் தொலைக்காட்சியில் பார்ப்பதில்லை. ஞாயிறு ஒன்றுதான் பொழுது போக்கு ஞாயிறு.

3. பொதுவில் / வெளியில்

• நமக்கு வேண்டாம் என்றால் தெளிவாக "நான் அதற்க்கு சரிப்பட்டு வர மாட்டேன்" என்று காயப்படுத்தாமல் சொல்லிவிடுவது.
• நேரத்தை வீணடிக்கும் எந்த செயலியையும் அலைபேசியில் வைத்திருப்பதில்லை. முடக்க முடியாத செயலிகளின் அறிவிப்புகளையாவது முடக்கிவிடுவது.
• தவறாமல் வருமானத்தில் 20% சேமிப்புக்கென ஒதுக்குவது.
• தேவையில்லாத ஆன்லைன் ஷாப்பிங், டிஸ்கவுண்ட் விற்பனைகளில் நேரத்தையும், பணத்தையும் செலவழிப்பதில்லை.
• யாரிடமும் எதிர்பார்ப்பு வைப்பதில்லை. முக்கியமாக நம்மிடம் உதவி பெற்றவர்களிடம்.
• ஆர்வம் காட்டாத நண்பர்களுக்கு அறிவுரை வழங்குவதில்லை.

4. இப்போதைய புது முயற்சிகள்

1. அலுவக வேலையை வீட்டுக்கு எடுத்துச்செல்லாமல் இருத்தல்.
2. புகைப்படம், எழுத்து போன்ற மனம் விரும்பும் செயல்களில் ஈடுபட போதிய நேரம் ஒதுக்குதல்
3. நச்சு நபர்களை தொடர்பு எல்லைக்கு வெளியே நிறுத்தல்.
4. தேவையற்ற பேச்சுகளில் ஈடுபடாமல் இருத்தல்.
5. இரவு 10 மணிக்குள் தூங்கிவிட முயற்சித்தல்.

பின்குறிப்பு

உங்கள் வேலை சூழ்நிலைக்கேற்ப அலுவலக பட்டியலையும், அலுவலக சூழ்நிலைக்கேற்ப பொதுவெளி பட்டியலையும், வீட்டுச் சூழ்நிலைக்கேற்ப (!) மொத்த பட்டியலையும் மாற்றிக்கொள்ளவும்.

மதிவாணன்

·

16 ஜூலை  /ta/quora /30/07/2020